මහගංආරා යනු දේශීය මත්ස්‍ය විශේෂයක් වන අතර මාංශභක්ෂක භෝජන විලාසයක් සහිත ප්‍රමාණයන් විශාල මත්ස්‍යකි. මොවුන් සෙන්ටිමීටර 80ක් පමණ දිගට වර්ධනය වේ. ඔවුහු පාකිස්තානයේ සිට චීනයට දක්වා ද දකුණින් තායිලන්තය දක්වා ද ව්‍යාප්තව සිටිති. තවද කළු ගං ආරන් ශ්‍රී ලංකාවේ පහත රට ප්‍රද්ශයන් පුරා මීටර් 500 ක උන්නතාංශයක් දක්වා ව්‍යාප්තව සිටියි. පරිණත මත්ස්‍යකු පෘෂ්ඨීයව දුඹුරු පැහැයේ සිට කළු පැහැයත්, උදරීයව අළු සහ කහ පැහැයත් ගනියි. පැටවුන්ගේ වලිගෙයහි කළුදාරයකින් වට වු කහ පැල්ලමක් ඇත.

මත්ස්‍යයා වර්ධනය වීමත් සමඟ මෙම පැල්ලම ක්‍රමෙයන් මැකීයයි. මෙම විශේෂය තමන් වාසය කරන භූමිය අන් සතුන්ගෙන් වෙන් කර තබා ගන්නා අතර එම විශේෂයේම වෙනත් මත්ස්‍යයකු එයට පිවිසි විට ඌ පළවා හරියි. මොවුන් ප්‍රචණ්ඩත්වයක් නිරූපණය කරන මත්ස්‍ය විශේෂයති.

සාමාන්‍යයෙන් දිය යට වැඩෙන ජලජ ශාක ප්‍රජාව සහිත ගංගා සහ ඇළදොළවල ගැඹුරු ප්‍රදේශවල විසීමට මෙම විශේෂය රුචිකත්වයක් දක්වයි. මොවුන් මිනිසුන්ගේ පරිභෝජනය සඳහා යොදා ගන්නා මත්ස්‍යයෙකු වේ. වාසස්ථාන විනාශ කිරීම, ධීවර කටයුතුවලදී අධික ලෙස ඇල්ලීම සහ පරිසර දූෂණය හේතුවෙන් ස්වභාවික පරිසරවල මොවුන්ගේ ප්‍රමාණයෙන් විශාල මත්සයින් සංඛ්‍යාව දුර්ලභ වීමත් විශේෂයේ ගහණ ඝණත්වය අඩු වීමත් සිදු වෙමින් පවතී. විල්පත්තුව් දී වැව් හා ඒ ආශ්‍රිත ගංගාවලින් මොවුන් හමු වේ.