වියළි කලාපය තුළ සිදුවන පාරිසරික සන්තතියක අවසාන අවස්ථාව ලෙස නිවර්තන වියළි සදාහරිත වනාන්තරයක් බිහි වේ. විල්පත්තු ජාතික උද්‍යානය ද වියළි කලාපය තුළ පිහිටා ඇති බැවින් එහි දී හමුවන වනාන්තර ආකාරයද නිවර්තන වියළි සදාහරිත වනාන්තරයයි. මෙම වනාන්තර දැවමය වටිනාකමත් සහිත දේශීය ශාක මෙන්ම ‍අනෙකුත් වන ජීවීන් උදෙසා රැකවරණය සලසන ස්ථානයක් ලෙස සැලකේ. ජීවත්වන විශේෂයන්ගේ සංයුතිය හා වෘක්ෂලතාදියෙහි උස පදනම් කර ගෙන මෙම වනාන්තර තවදුරටත් බෙදා දැක්විය හැකිය. එනම් මීටර 20 ට අඩු වියන් ස්ථරයක් සහිත වනාන්තර, මධ්‍යම උසක් සහිත වනාන්තර, උස අඩු හෙවත් කුරු වනාන්තර සහ පාෂාණ මත ඒවා ආවරණය කරමින් සෑදුණු වනාන්තර ඊට ඇතුළත් වේ.

නිවර්තන කටු පදුරු සහිත වනාන්තර මීටර් 4-6ක් පමණ උසට වර්ධනය වු කටු සහිත ශාක වලින් සමන්විත වේ. මෙම වනාන්තර තියුණු කටු සහිත ශාක මෙන්ම ඉතා දෘඩ තියුණු බෙවන් තොර කටු සහිත ශාකවලින් ද සමන්විත වේ.

ගංගාධාර වනාන්තර ගංගා සහ ඇළදොළවල් දෙපස දැකිය හැකිය. මෙසේ ගලායන ගංගා මුහුදට වැටෙන වෙරළ සීමාවේ දී මෙම ශාක ප්‍රජාව කඩොලාන පරිසර පද්ධති හා සම්බන්ධ වේ. කලාඔය හා මෝදරගම් ආරු ගංගා ආශ්‍රිතව සරුවට වැඩුණු ගංගාධාර වනාන්තර හමු වේ. මෙම වනාන්තර කුරුල්ලන්, වවුලන්, උරගයින්, උභයජීවීන් ආදි විශේෂ සඳහා කදිම නවාතැන්පලක් වී ඇත.
වියළි පතන තෘණබිම් විල්පත්තු ජාතික උද්‍යානයේ බටහිර දෙසට වන්නට සුලභව හමු වේ. ජාතික උද්‍යාන භුමිය පුරා ව්‍යාප්ත වී ඇති මෙම තෘණබිම් අතිතයේ විසු මිනිසුන් විසින් විනාශ කරන ලද වනාන්තර ප්‍රදේශවල සුලභව හමු වේ.